الـديـن الـجـديـد

عـزيزي القارئ و المشاهـد و المستمع كمان .

عزيزي العربي ( إذا حـدا من المشاهدين العرب بعدو عايش

و إلـو نـفـس يتابعنا ــ وطبعا لازم يـوطــّي صوت التلفزيون شويّة )

عزيزي الفينيقي و الفرعوني و السومري والكنعاني و يـلــّي بـيـحـبّ يـنسب

نفسه للعصر الجليدي و البري كامبري كمان حتى يرتاح ضميره ..

عزيزي الإنسان ـ في مراحله المتأخرة ــ المنتوف و المسحوق

و المعـتـّر والمحروق سـلاّفـه و اللي مش عارف إذا كان رح يتعـشّى

اليوم أو رح ينام بلا عشا .

عزيزي ابن الحلال أينما كنت

و عزيزي أخو الشليتة أينما نمت و أينما قمت .

لاحظ و تابع و اقرأ جيداً هذه الأخبار المتوالية وراء بعضها

البعض .. انتبه و اعـتـبـر ... اعـتبر (من العبرة مش من الـتـعـبـيـر )

لأنك عاجز عن الـتعبـير متلي أكيد .

ــ ما حدث و يحدث في مصر بخصوص عناصر دعم المقاومة ( هيدا

حكينا فيه اليوم و ما بدنا نضلّ نعـلــّـك فيه .. عندك خبر )

ــ ما حدث في الأردن بخصوص عناصر حماس ( حكينا فيه ) .

اسمع يا حبـيب القلب .. اسمع و افـتح عيونك منيح و انـتبه

انه كلّ هالأحداث ورا بعضها و سبقـتها مجازر غزة و الصمت

العربي و الدولي و سبقـتها عشرات السنين من المؤامرات

و المذابح و الدعم لإسرائيل .. لكن لاحظ الخط البـيـانـي كيف

بـدأ زمان و لـوين عم يـوصل هـلـّئ و لا تـنـسـى طبعا المرحلة

الـلـي صارت فيها عمليات المقاومة ضـد الإحتلال و عقب مجازره

التي لا تـنـتــهـي أبـداً و انـتـهـاكه لكل الأعراف الإنسانية

و الحيوانية كمان و مصادرته الأراضي و تشريد الناس

و تجويعهم , هـالـعـمـلـيـات صـارت عـم تـنـوصـف على لسان

( الرئيس الفلسطيني ) بالعمليات الحقيرة و الـقـذرة , و سلاح

المقاومة بـيــنـوصـف عـنـد بعض قـحـاب السياسة اللبنانية

بـسـلاح الـغـدر .. لا تـنـسـى إنـّه قــطـعـنـا هـالمرحلة ..

و تـابـع :

ــ القبض على عميد متقاعد في الأمن العام اللبناني , يرأس

شبكة تجسّس لصالح إسرائيل تعمل في لبنان منذ عام 1984

و العميد وصل إلى مرتبة رئيس قسم الجوازات في الأمن العام

اللبناني , و يـُرجـّـح ( حسب الأجهزة الأمنية ) أنـه سـلــّم الـعـدو

أرشيف الدولة اللبنانية ( في مجال عمله المهم جدا ) كله على

مدى هذه الأعوام ...

فهمت ؟؟ إنشالله تكون فهمت .. مع انه الفهم صار صعب .

اسمع و اقشاع :

ــ الولايات المتحدة الأمريكية ( نفسها اللي قامت على أنقاض

و جماجم الهنود الحمر ) سوف تــُـسـلـم الدولة اللبنانية ( اللبنانية

انـتـبـه منـيح ) طائرات استطلاع بدون طيار الغرض منها مراقبة كلّ

من تــُـسوّل له نفسه إطلاق صاروخ باتجاه اسرائيل ( نفسها

اللي قامت على جماجم الفلسطينيين ) و مراقبة أيّ تحركّات

لأفراد أو جماعات في الجنوب قد تشكّل خطر على حدود ( اسرائيل ) .

سمعت يا أخو الشليتة ؟؟ الحكي إلي و إلك .. لا تزعل ..و لا تاّخذني

لأني فعلاً ما عدت قادر جـمـّع أفكاري أبداً ...

خلاااص أنا رفعت العشرة .. و إذا استمر الوضع هيك يمكن

ارفع العشرين .. و هيك كارثة ..

العالم بـأسره .. الغريـب و القريب .. العدو و الصديق ..و حتى

اللي ما إلو علاقة نهائيا بـأيّ شيء بهالدنيا .. كـلـّهم ما عندهم

شغلة و لا عندهم همّ إلاّ شيء واحـد فقط !!!! حماية اسرائيل ..

الخوف على إسـرائـيـل .. الحرص على مشاعر اسرائيـل . أوعى

حدا يزعج اسرائيل .. نموت نموت و لا تـنزعج إسرائيل ... مستعدين

نخسر حـيـاتـنا و نخسر أبونا و أمنا و أخونا و ابن عمنا و الحارة كلها

و الحارات المجاورة و الـوطن كـلـّه بـأرضه و سـمـاه .. بس ما تـنزعج

إسرائيل ... ما حدا يـزعج اسرائيل .. اسرائيل نايمة و إيـّاكم حـدا

يرفع صوته حتى ما تصحى من النوم اسرائيل .. اقطعوا الـنـَـفس

أحسن ما تشخـروا بالغلط و تـنزعج اسرائيل .. يا فلان ادبح ابنك

و طـلــّق مرتك لأنه اسرائيل مزاجها مش منيح اليوم .. مزعوجة

الله أعلم من شو مزعوجة اسرائيل .. اعمل أي شي يـروّقـلها

مزاجها لإسرائيل ارقص قدّام اسرائيل متل السعدان حتى تروّح

عن نفسها شوية اسـرائـيـل .

انـتـ.. ك إذا اقـتضى الأمر حتى تـنـبسط اسرائيل .. يمكن اسرائيل

بتـنبسط إذا شافـتـك عم تـ....اك .. شو بـيعرّفـك .. جـرّب .. حاول ..

كـلـّه بـيهون في سبـيل ترتاح و تـنبسط اسرائيل . و ذنـبـك مغفور ..

لا تخاف أكيد ذنـبـك مغـفـور .. لأنه هيدي إسرائيل .. يا رضى اسرائيل

ثم رضى اسرائيل ثم رضى الله و الوالدين و اسرائيل .. و حتى

بلاها هـيدي رضى الله و الوالدين .. بس ترضى اسرائـيـل

بـيـمشي حالـك .

يا عالم .. يا ناس يا هووووو .. انـتـو بـتعـرفـوا شي و مـخـبـّيـنه

عـنـي ؟؟

قسماً بالله يـمـيـن عظيم .. أنا ما بعرف أيّ شي ممكن يخـلـّي

العالم كلّه يخاف لهالدرجة من انـزعاج اسرائيـل و يـبـيع تـيابه

و يـبـيـع دمّه و أرضه و عرضه ودينه و حياته و حياة الناس أجمعين

حتى يـسـعـد اسرائيل ..و يـفـرّح قـلب اسرائيل و حتى اسرائيل تـنام

مرتاحة . حدا منكم بـيعرف شي ؟؟ حدا منكم عنده أي معلومة يعطيني

إياها لوجه الله أو لوجه اسرائيل ؟؟؟

العمى بقلبكن

العمى بقلبكن

العمى بقلبكن

شو صاير بالدني ؟؟؟؟؟!!!!!

أكيد في شي أنـا ما بـعـرفه .. أكـيد ..

مش معـقول كلّ هالبشرية تـخـدم صرماية إسرائيل عالفاضي

و من دون سبب مهم و كبير و عظيم جدا .. أكيد مسألة حياة

أو مـوت للبشرية جمعاء .. أكيد .. و أنا ما عندي خبر , و رح

موت كافر و ضـالّ ..

أكيد هـلــّئ أنا اسمي " أبو جهل " عـند اسرائيل و عـند الـلـّي

بـيـعـرفوا قـيمة اسرائيـل و بـيعرفوا ليش لازم نموت نموت

و تحيا اسرائيل .. بل ترضى و تبتسم اسرائيل .. و ليش لازم

نـفـدي مـزاج اسرائيل و ابتسامة اسرائيل و كعب سـكـربـيـنـة

إسرائيل , بالروح و بالدم و بالمال و الولد و بالأرض و الوطن

حتى ترضى اسرائيل و حتى تـشـعـر بالأمان اسرائيل , و حتى

تـدبـح الناس و هيّ فايقة و رايقة و بالها مش مشغـول بأيّ شي

تـاني ممكن يـنـزع المزاج أثـناء المجازر ... أكيد عم يقولوا

عني أبو جهل و أكيد أنا من الضالين .. طيب حـدا يدعيلي بالهداية !!

حـدا يحاول يـهـديني إلى الصراط الإسرائيلي !!! حـدا يـحـنّ قـلبه

عـليّي !!! العمى بـقـلبكن ...

طيب أيمتى نـزل الدين الجديد ؟؟ و مين الـلـّي حـمل الأمانة

و البشارة للناس أجمعين إلاّ أنا ما كان يـعـطيـنـي عالـقـليلة

عـلـم و خـبـر ؟؟؟!!! أفـتـونـا أرجوكم : هـل عـلى الجاهـل

حـرج في هـذا الـديـن ؟؟

الجاهل يعني اللي ما وصـلـه الخبر .. ما وصـلـتـه البشارة ..

يـعـنـي أبـو جـهـل كـان سـامـع و شـايـف و عـم يـنـكـر

أنـا أقسم بشرفي مـا عـنـدي خـبـر !! و لا بـعـرف ليش

هيك صايـر , و لا شـو الـقـصــّـة ؟؟ و لا شفـت و لا سمعت

و لا حـدا دعـى قـدّامي لـديـن جـديـد قـائـم على رضى و خـدمة

و عـبـادة اسرائيل .. أبـداً !!!

و كيف انـتـشـر و عـم يـنـتـشر هـالـدين من ورا ضهري ؟

كـيـف ؟؟؟؟

جـو غـانـم