ــ طـنــّـوس : يـا زلـمـي مـش غـريـبة هالـهـجـمـة الإعلامية
المصريـّـة على حزب الله و عـلـى شـخـص أمينه العام بهالطريقة ؟
يـعـنـي فـي شـي مـش عـم يـفـوت بـراسـي !!
ــ أبـو الـعـبـد : إي انـتـبـه مـا يـفـوت بـمـطـرح تـانـي , خـود
حـذرك . لأنه الأمور عم تـاخـد منحى خطير .
ــ طـنــّوس : هـلــّئ عم بحكي جـد أنـا
ــ أبـو الـعـبـد : أنـا مـش مـسـتـغـرب , لأنـّـه الحكومة المصريـّة
واضحة جداً بالسنوات الأخيرة بانحيازها ضد المقاومة , سواء
كانت فلسطينية أو لبنانية , و هـلـّئ اجتها فرصة للردح باسم
السيادة و الإستقلال , متل الشباب اللي عندنا , ثوّار الأرز
و القرنبـيط . يـلــّي السيادة عندهم بـتـبـدأ و بـتـنـتـهـي عـنـد
عـامـل سوري عم يشتغل بورشة أو عم يـبـيـع مـنـاقيش .
و طائرات بني صهيون عم تلعب بالجو فوق راسهم , مـا حـدا منهم
بـيـستـرجي يفتح نـيـعـه ويقول : كـشّ يـا حمام . بس أنا مـتـفـاجئ
بـشغـلـتـيـن ..
ــ طـنــّوس : خـيـر ؟
ــ أبو العبد: أوّل هـام .. ( أوّل هام هـيدي كلمة صعيدية مسموح نستخدمها
قولـَك أو فيها انتهاك للسيادة ؟؟)
ــ طـنــّوس : لا .. لا .. خـود راحـتـك .. لأنه الكلام ما عليه جمرك .
ــ أبـو العبد : إي صحيح .. بس مقاومة إسرائيل عليها جمرك غالي.. المهم
أوّل هام .. متفاجئ بدرجة السعار اللي صابت بعض أقلام الصحف
الحكومية المصرية .. يعني مش حلوة بحق ّ صحف عريقة متل هيدي
يكون فيها ناس تكتب بهاللغة الرخيصة .. لكن يبدو أنه بالسنوات الأخيرة
إجوا الشباب و عملوا دورات بالإعلام الجديد عند موظفين و كـَـتـبة الشيخ سعد .
يا خسارة هالصحف العريقة و خسارة التعب اللي تعبوه عليها أساتذة كبار .
دخلك مؤسس صحيفة الأهرام مش اللبناني بشارة تقلا اللي من كفرشيما
الله يرحمه ؟ هـلـّئ صاروا عم يتعلموا من فارس خشان ,, لو أخونا بشارة عرف
انه رح يوصل الامر لهالمواصيل كان أسّس فرقة دبكة . ( الأهرام بناها و تعب
عليها و عمل فيها و طوّرها أساتذة مصريين عظماء , كي لا يـُفهم كلامي على
نحو خاطئ ). ولو كان الأستاذ الكبير علي أمين هو وأخوه مصطفى الله يرحمهم
بيعرفوا انه رح توصل جريدة الأخبار لهالمواصيل ما كان علي أمين استرجى
يعترف قدّام أمّه في يوم من الايام انه بـيشتغل بالصحافة ( كانت أمه تظن أنّ
الصحافة هي مهنة الفاشلين .. الله يرحمها كان عندها بعد نظر .. و ظلّ لسنوات
طويلة يخفي عنها الأمر و يكتب باسم مستعار ـ السندباد ـ إن لم تخنـّي الذاكرة ) .
و تـانـي هـام , و هـيـدا كتير مستغربه ,, إنه الجماعة عندنا
ساكتين تماماً .. و لا نـَفــَس .. و لا كلمة .. مش معقول يا زلمي .
بالعادة إذا واحـد جـنـوبي عايش بالإكوادور , و مـاشي بطريق
بعيد و مقطوع هونيك بالإكوادور , و انـحـصـر الزلمي و فـنـتـر
جنب الطريق ( شـخ ّ يعني يا إخواننا بالإنسانية ) . دغري كانوا
الشباب يعقدوا حلقات الدبكة تضامناً مع سيادة الإكوادور اللي
انتهكها أبو حسين الجنوبي . و بـيطلع أبو حسين يا معلم , عميل
لحزب الله و عم يشكــّل خلايا للحزب بأمريكا الجنوبية ..
الجماعة ساكتين .. غريب .. مع انه هـنّي و الحكومة المصرية
Two Asses in one underwear
( عم نعيد جملة أم حسين كتير هالإيام .. بالإذن يعني ) .
ــ طــنـــّوس : يعني قـصـدك في تـبـادل أدوار هالفترة بينهم
و بين الجماعة بمصر ؟
ــ أبـو العبد : و الله حلوة هيدي تبادل أدوار .. تــخـيـّل الحكومة
المصرية عم تشتغل كومبارس أو دوبـلـيـر عند مـيـشـو مـعـوّض !
قليلة !!! بـتـذكر يوم اللي جعجع راح على مصر و قال انه ( ميليشيا )
القوات اللبنانية و الحكومة المصرية لديهما نفس الرؤية السياسية
للمنطقة ؟ بقى ما في شي غريب يا معـلـّم .
ــ طـنــّوس : قال بـيريز عم يتفرّج و يضحك .. و الغريب انه مبارح
بالظبط .. الإسرائيليين مسكوا شاب سوري و هو عم يحاول يدخل
عالأراضي المحتلة من حدود الجولان .. و ما سمعنا هالطـنـّة
و الـرنــّة .. مسكوه و أخـدوه .. و لا تعليق حتى .
ــ أبـو الـعـبـد : إي هـيـك بـيوضـح تـبـادل الأدوار يا حبيبي .. هـيك
الـدوبـلـيـر بـيـقـبـض مـنـيـح .. اسرائيل بتمسك و الجماعة عندنا
بـيردحوا و بـيـدبــُـكـوا دلعونا و بـيعملوا عـناتـر على هالمعتـّرين
و المظلومين . يعني لـو الحكومة المصرية مسكت الزلمي وحاكمته بهدوء
و بشكل عادي بتهمة القيام بأعمال غير قانونية داخل الأراضي المصرية ..
كان الواحد بـيخرس و بـيسكت .. أمـّا هالحملة الغريبة العجيبة على المقاومة
و تصويرها انها أخطر على مصر من ثقب الأوزون و من الأزمة
المالية و من كل الأزمات المعروفة و غير المعروفة و انها العدو النهائي لمصر..
هون المفاجأة .. هالعداء الغريب لكل شي اسمه مقاومة عربية ضد
اسرائيل من قبل الحكومة المصرية .. هيدا اللي مش مفهوم .
سكوت اسرائيل إلاّ عن االضحك و الشماتة , مع انه الموساد هو
اللي كشف الشباب .. هـون الـسـرّ و الكارثة . مع انـه الشباب
كانوا عم يـقـومـوا بـأعمال ضد الأمن الصهيوني مش ضـدّ الأمن
المصري . و استخدامهم للعبور و التمركز بالأراضي المصرية
كان بـيـنـقضى بـجُـنـح مخالفة القانون و التسلل عبر الحدود
بطريقة غير قانونية , من دون هالمسرحيات التافهة و الرخيصة .
هـون يا صديقي يـبدو تبادل الأدوار .. اسرائيل بتضحك و بتبتسم
و بتـشمت . و نحنا بعالم تاني تماما .. عالم ما بقى تفهم منه شي .
الإنسان مـنـنـا صـار عـدوّ نـفـسـه . و هيدا ما بينطبق على أي أمة أخرى .
ــ طـنــّوس : و شو رح يقبض الدوبلير من هالدور حتى مـسـتـميت
كل هالإستماتة ؟؟
ــ أبـو العبد : رح يقبض " جـيـمـي " يا صديقي .
ــ طـنــّوس : و انـت قـابـض موضوع جـيمي جـد ؟
ــ أبو العبد : مش مهم أنا أو غيري إذا قابضينه جد أو مزح
الكارثة إنه أبوه و أمّه قابضينه جـد .. جيمي أو لا أحـد على
رأي المسلسل المكسيكي .
ــ طـنــّوس : مـعـقـول .. كلّ شي معقول .. مع إنـّي ما بـظـنّ
انـه أبـوه رح يـتـركـلـه مجال يوصل .. بـعـتـقـد انـه رح يبقى
كمان خمسين سنة إذا مش أكتر .
ــ أبـو العبد : شـو جـنــّيت انـت ؟؟ الزلمي عمره فوق التمانين
شو خمسين ما خمسين كمان ؟؟؟
ــ طـنــّوس : إي إي .. لا تستغرب , اتـطــّلع بوجهه منيح
هـيـدا الزلمي علامة من علامات القيامة .. معجزة من معجزات
اّخر الزمان !! و كلّ يوم عن يوم عم تظهر و تـتـجـلـّـى معجزاته
أكتر و أكتر .
جـو غانم
ليست هناك تعليقات:
إرسال تعليق