بخصوص الديمقراطية الأمريكية

ـــ أبــو الـعـبـد : بــتــعــرف يـا طــنــّـوس .. أنا ما كنت بتمنّى اوباما

يفوز بالإنتخابات الأمريكية أبداً ..

ــ طـنـّوس : لا يـا زلمي .. مجنون انت ؟ لكان كان بدّك هالمعتوه

ماكين يفوز ؟

ــ لا يـا طـنـّوس ... أنا مـش معجب بـمـاكين .. و بعرف انه ما أجحش

من بوش غير ماكين و ما أجحش من ماكين غير بوش .. هيدا ما إلو

علاقة بنظرتي للموضوع أبداً ..

ــ لـكـان شـو السبب ؟

ــ بــتــعــرف يـا طـنــّـوس كـم رئيس أمريكي مـرق عـلـى هـالبيت

الأسود مـن يوم إلقاء القنبلة النووية على هيروشيما و ناغازاكي ..

و من يوم اغـتـصـاب فلسطين لـلـيـوم ؟ و كـم رئيس إجى و راح

من يوم احتلال الجولان و اجـتـيـاح بيروت و مـجـازر صبرا و شاتيلا

و قانا و جنين و غيرها و غيرها .. لـحـدّ احتلال العراق و عجائب أبو

غريب و غوانتانامو .. بتعرف تــعــدّهم يا طنـّوس ؟ و بتعرف كم واحد

منهم جمهوري و كم واحد ديمقراطي ؟

ــ لا والله ما بعرف .. بس كتير .. أشكال و ألوان ..

ــ بـتـذكـر يـا طـنــّوس أو بـيـذكـّر بــَـيــّـك من قبلك انه في حدا منهم

نظرلك على انــّك بني اّدم و إلك حقّ ؟ و إنـّه دمــّك إلو تمن ؟ أو انـّـك

انت و كـلّ عيـلـتـك و جيرانك و اللي نـفـضـك .. كلـّكم على بعضكم

بـتـسـاووا جـزمـة واحد اسرائيلي بـنـظره ؟ حـدا منهم عطاك

هالإحساس لـلـحـظـة وحدة ؟

ــ نـيـفـر

ــ جــلــّـس قعدتك و لسانك و احكيني عربي .

ــ ما تواخذني .. بعدني متأثـــّـر بالمشهد الديمقراطي الأمريكي اللي جاب

واحد أسود على البيت الأبيض .... الجواب .. لا .. أبداً .

ــ دخـلـك انت مندهش و مبسوط انه واحد أسود إجى عالبيت الأبيض ؟

ــ طبعاً .. بعد ما كانوا السود مضطهدين و ما إلهم مكان يقعدوا فيه

حتى بباص نقل عمومي .. يوصل مهاجر منهم للحكم .. و يقعد بالبيت

الأبيض .. هيدا شي عظيم .

ــ طـيـّب انت مـا خـطـرلــَـك مـثـلاً شي مـرّة تـسـأل .. لـيـش مـا في

أمريكي أصلي من أهل البلد الحقيقيين .. هـنـدي أحمر يعني .. وصل

لـلـبـيـت الأبـيـض ؟ لأنه الهنود الحمر كلهم حمير مثلاً .. أو أغبياء

و البيض و السود أذكى منهم ؟ معقول ما بقي واحد منهم على الأقل

من مـئـات السنين لهلـّئ .. و عرف يقرا و يدرس و يتعب على حاله

و يوصل لـلـي وصل إلو أوباما و غيره ؟

ــ مـا بـعـرف .. بـس بـظـنّ انـه مـا بـقـي منهم حـدا ..انـقـرضـوا .

ــ أهــا .. قـلـتـلـّي مـا بقي منهم حـدا .. قـصـدك قـتـلـتـهـم الديمقراطية

الـتـي وصــّـلـت أوباما ذاتـه للحكم ؟ لا .. بـقـي مـنـهـم .. بـس اللي

بـقـي مـنـهـم يـا طـنــّـوس .. عملت الديمقراطية مـنــّـه مـدمـن أو قـوّاد

أو بـأحسن أحواله .. عامل بناء لـنـاطـحـات سـحـاب . لأنه هو العامل

الوحيد اللي كـان يـسـتـرجـي يـوقـف عـلـى سـقـالة الحديد عـلـى

ارتفاع خمسين ومائة متر ..عـلـى كـلّ أنـا بـعـدنـي ما جاوبـتـك لـيـش

أنا مش مبسوط بوصول أوباما .. الـسـبـب هـون .. مش بـأمريكا

و لا عند ماكين و لا أوباما .. السبب فينا نحنا .. السبب اني زهقت

و أنا شوف العرب كل مرة مبسوطين بوصول هالرئيس الأمريكي الفلاني

أو زعلانين من وصول هالرئيس الـعـلاّنـي .. بـعـدنـا مـا تـعـلـّمـنـا

انـه نحنا مش داخلين بالحسبة لا حلال و لا حرام .. و ما حدا عامل

لنا حساب .. و بـعـدنا ما عرفنا انه هالديمقراطية بعمرها ما جابت

لنا نحنا العرب غير الرؤساء اللي قلبهم أسود أكتر من وجه أوباما

و لسـّه ما شـفـنـا و لا رئـيـس واحد أبيض من يوم ما الأمريكي صار

يعرف اننا موجودين على سطح الأرض و عندنا قضايا و حقوق لحدّ

هاللحظة . الفرق الوحيد انه هالمرّة جابتلنا واحد أسود خالص من برّا

و من جوّى .. و هيدا لزوم الأفلام الهوليودية و الإستعراضات الأمريكية

اللي هي نفسها خلـّت أرنولد شوارزنجر يوصل لمنصب حاكم إحدى

أكبر الولايات الأمريكية .. لأنه ممثل فقط .. و فقط .. و فقط .. و بعد كم

سنة .. ارنولد نفسه رح يوصل للبيت الأبيض لنفس السبب .. و بذات

الديمقراطية و ذات الشعارات .. ويمكن الممثل الهوليودي اللبناني

طوني شلهوب يوصل للرئاسة الأمريكية و يقولولنا هيدا واحد عربي

وصل للبيت الأبيض .. شفتوا الديمقراطية ؟ ليش أصلاً جون أبو زيد

قائد القوات الأمريكية بالعراق و المنطقة قبل سنتين ما كان عربي

ابن عربي و لبناني ابن لبناني .. قائد جيش الإحتلال .. و بتقول لي

ديمقراطية و أسود و أبيض ..

ــ بـس يـا خـيـّي .. في رئيس بيكون أحسن من رئيس .. هيدا شي

طبيعي .. و لازم نفرح اذا وصل واحد منيح ..

ــ منيح بشو يا طـنــّوس ؟

ــ يعني عنده برنامج جـيـّد .. فيه شيء و لو صغير لصالحنا .. مثلاً

أوباما عم يقول انه رح ينسحب من العراق .. هيدا شي كتير منيح .

ــ يـا طـنـّوس .. هـلـّئ انت لو رئيس أمريكي .. متل ما انت .. على

حمرنـتـك و سـمـاكـة مـخـّك .. كـنـت بـتـبـقـى بـعـد دقيقة بالعراق ؟

ــ لا

ــ ليش ؟

ــ لأنه شو بدّي اعمل بالعراق .. اللي كان بـدّي ياه من العراق أخدته

و هـلـّئ وجودي صار كارثة .. ما إلو أي داعي .. ما فيه غير الخسارة

العراق صار بـجـيـبـتـي الصغيرة .. معاهدات و اتفاقيات و عملنا .. نفط

و صار تحت إيدنا تماماً.. جيش و صار تحت أمرنا و تحت إشرافنا .

حكومة و مش قادرة تدخل التواليت من غير ما نـوقــّع لها على أذن سفر

إلى التواليت .. قـواعـد و عملنا ... شو بـعـد بـدّو يـبـقــّـيـنـي بالعراق

كجيش أمريكي مـحـتـلّ ؟ شـو بـدّي اعمل ؟ انه بس بـحـرّض العالم

و الرأي العام علييّ ؟ خلص .. بطلع من العراق من الباب العريض و بقول

انه العراق صار بلد حرّ مستقل .. و هو بالحقيقة مافي مخلوق بالعراق

قادر يـسـتـقــّـل سيارته إلاّ بأمري ..

ــ و أنـا بـقـول عـنــّـك حـمـار ؟؟؟

أنـا بـرشــّـحك انت لمنصب الرئيس في الإنتخابات الأمريكية القادمة .

لا أوباما و لا ماكين أذكى و أفهم منك . و كمان هيك الأمريكان بيقدروا

يفتخروا انهم بعد ما جابوا واحد أسود عالبيت الأبيض .. هلّئ جابوا

واحد مـتـحـوّل عـقـلـيــّاً .. اللي هو انت طبعاً .. و هيدا دليل على مدى

القيم السامية اللي قائم عليها المجتمع الأمريكي النقي و اللي بيستحق

يحكم كوكب الأرض .

ــ لحظة لحظة ... شو قصدك بمتحوّل عقلياً ؟؟ شو يعني ؟

ــ شو بـيـعـرّفــنـي .. بس أعرف شو الفرق بين الرئيس الأمريكي

الأبيض و الرئيس الأمريكي الأسود .. وقتها يمكن أعرف شو يعني

مـتـحـوّل عقلياً .

جــو غـانـم

* * * *

بـخـصـوص كـولـومـبـوس و الحلم الأمريكي

.......................