تـداعـيـات كـائـن زعـلان

ـــ لـو هـالـدنـي مـا فـيـهـا ظـلـم يـا طـنـّوس , مـا كـنـّا عـرفـنـا الحـقّ

و لا دقـنـا طـعـم الـحـق , لـو هـالـدنـي مـا فـيـهـا جـور و عـذابـات

و قـهـر , مـا كـانـت قـامـت ثـورات , و لا كـانـوا الـنـاس عـرفـوا لـون

الـنـصـر , و ريـحـة الـحـريــة , لـو كـان الـحـقّ وحـده عـايـش بـهـالكـون

كـان تـعـِـبْ , و كـان يـبـسـوا وراقــه مـتـل الـشـجـر بالـخـريـف , الـعـدل

خـيّ الـظـلـم يـا طـنـّوس , خـيـّو الـلـي مـا بـيـقـدر يـعـيـش مـن غـيـره

و لا بـيـقـدر يـتـصـالـح مـعـه . و ورا كـلّ ظـالـم , فـي نـاس عـم تـحـضـِّر

الـفـرح و هـي عـم تـلـوك الـقـهـر , فـي نـاس عـم تـرسـم و تـشـكـِّل لـون

الـعـدل , و هـي عـم تـنـقـش عـلـى صـدورهـا و على قـلـوبـهـا طـعـم الـعـذابـات .

فـي نـاس بـدهـم يـثـورا , وفي مـسحوقين و مقهورين عـم يـنـطـروا الـنـاس

الـلـّي بـدهـم يـثـوروا , لـكـنْ إيـّـاك تـاّمـن إنـّه الـظـلـم لازم يـبـقـى و إنـّـه

الـحـق مـا بـيـعـيـش لـوحـده , لـو سـلـّمـوا الـنـاس بـهـيـدا الـشـي يـا طـنـّوس

كـان الـحـق مـات , و كـان بـقـي الـظـلـم عـايـش لـوحـده , كـان الـحـق

يـبـس , و وقــع مـن أمـانـي الـنـاس مـتـل مـا بـيـوقـع ورق الـخـريـف .

و كـنـّـا صـرنـا كـلـّنـا عـبـيـد الـظـلـم يـا طـنـّـوس , كـنـّا صـرنـا ظُـلاّم

و كـنـّـا أكـلـنـا بـعـضـنـا و أكـلـنـا حـالـنـا مـتـل هـالـنـار , إيـّـاك تـاّمـن

إنـّـه الـظـلـم حـقـيـقـة واقـعـة و لازم تـنـوجـد تـا يـسـتـمـر الـكـون , مـا

بـيـعـود فـيـك تـفـرح , و لا بـتـعـود تـنـطـر شـي , تـخـيـّل حالك عايش ومش

نـاطـر شـي ! . بـتـيـبـس يـا طـنـّـوس و بـتـمـوت و انـت مـاشـي , ويـن

مـا رحـت بـتـمـوت , و كـيـف مـا اتـطـّلـعـت بـيـكـونـوا عـيـونـك مـيـتـيـن

و نـظـراتـك مـا بـيـوصـلـوا لـمـطـرح , و الإشـيـا الـلـي عـم تـتـطـلـّع فـيـهـا

بـتـكـون مـقـتـولـة , قـاتـلـهـا الـظـلـم الـلـي عـايش بـقـلـبـك و صـايـر مـتـل

الـكـفـر . حـتـى خـيـالـك مـا بـيـعـود يـشـبـهـك , و يـمـكـن مـا عـاد يـرافـقـَكْ .

إيـّـاك تـقـول لابـنـك إنـّـه مـا فـي نـتـيـجـة . و إنـّـه شـو بـدّك بالـمـظـلـومـيـن

و إنـّـه عـيـش حـيـاتـك , و الـلـّي مـش عـم بـيـصـيـر بـبـيـتـك , مـا خـصـّـك

فـيـه و لا بـيـهـمـّك , إيـاك تـقـلـّـه شـو بـدّك بابن الجنوب وبالـفـلـسـطـيـنـي , و شـو

جـابـك عـالـعـراقـي , و مـن ويـن لـوين زعـلان و مـقـهـور عالإفـغـانـي و عَ ابـن

بـورمـا و ابـن الــصـومـال , إيـّـاك يـا طـنـّوس , إيـّـاك تـمـرق بـهـالـزمـان

و إنـتَ مـا خـصـّك بالـحـق غـيـر لـمـا بـيـكـون مـسـلـوب مـنـّك وحـدك .

إنـتَ بـحـاجـة لـكـلّ الـمـظـلـومـيـن الـلـي بالأرض , أكـتـر مـا هـمّ بـحـاجـة

إلـك , بـكـرا إذا وصـل عـلـيـك الـظـلـم و الـقـهـر و الإحـتـلال , بـتـلاقـي حـالـك

وحـدك , عـم تـصـرخ لـوحـدك و عـم تـنـقـتـل لـوحـدك , إيـّـاك تـقـول شـو

خـصـّـنـي بـفـلان الـمـقـهـور بـاّخـر الـدنـي .

انـقـهـر مـعـه يـا طـنـّـوس , حـتـى تـحـمـي حـالـك مـن قـهـر أعـظـم , شـو بـدّك

بالأحـزاب , شـو بـدّك بالـمـنـطـلـقـات الـنـظـريـة لـلـحـزب الـفـلانـي و الـحـركـة

الـفـلانـيـّـة , ولـَـكْ شـو بـدَّك بالـزعـيـم يـا طـنـّوس , إنـت الـزعـيـم و إنـت الحزب

و إنـت الـحـركـة و إنـت الـكـون , مـا حـدا أذكـى مـنـّك تـا يـعـمـلـّك حـزب و حركة

و لا حـدا عـلـى هـالأرض أقـدس مـنـك تـا يـقـعـد عَ كـرسـي مـريـح و يـعـمـل

عـلـيـك مـعـلـّم و تـفـوت تـقـسـم الـيـمـيـن قـدّامـه , الإنـسـان الـلـّي جـواتــك

هـو الـمـعـلـّم , هـو سـيـّد الـكـائـنـات اللطيف, و انـت لازم تـقـسـم الـيـمـيـن قــدّام

هالإنـسـان , و قــدّام الـكـائـنـات الـلـّي مـسـلـّمـتـك مـصـيـرهـا , اقـسـم اليمين

قـدام الـشـجـر يـا طـنـّوس , قــدّام الـعـشـب و الـعـصـافـيـر , انـحـنـي أمـام

ريـحـة الـورد و احـلـف الـيـمـيـن يـا طـنـّوس , احـلـف إنـّـك مـا تـكـون قـاتـل

و لا ظـالـم و لا عـنــصري و لا تـافـه , احـلـف إنـّـك مـا جـيـت عـلـى هـالـكـون

صـدفـة و ما رح تـفـلّ صـدفـة و إنـت مـا خــصـّـك بـحـدا , احـلـف إنـّـك مـا تـكـره

الـنـاس لأنـّهـم مـن غـيـر ديـنـك و مـن غـيـر طـائـفـتـك و مـن غـيـر جـنـسـك

و مـن غـيـر بـلـدك , احـلـف يـا طـنـّـوس , احـلـف إنــّـك تـنـتـمـي لـلإنـسـان

الـلـّي جـوّاتـك , و الإنـسـان الـقـريـب مـنـّك , و الإنـسـان الـلـّي بـاّخـر الـكـون .

و احـلـف إنــّك تـحـاول دائـمـاً تـصـنـع الـفـرح , حـتـى مـن قـلـب الـقـهـر , لإلـك

و لـلـنـاس , أنـا بـعـرف إنـّـك مـقـهـور يـا صـاحـبـي , و بـعـرف إنــّه الـدنـيـا

كـلـهـا ضـيـّـقـة عـلـيـك و فـيـك , و إنــّـك مـخـنـوق و مـش طـايـق حـالـك .

بـسّ إنـتَ هـيـك مـنـيـح يـا طـنـّوس , أنـا مـش عـم قـلـّـك تـضـلـّك مـقـهـور

تـا تـبـقـى مـنـيـح , لا , أنـا عـم قـلـّـك تـخـلـّـي هـالـقـهـر الـلـّي جـواتـك يـدفعك

تـا تـفـتـّش عـالـفـرح , عـالـعـدل , عـالـحـريـّـة , تـا تـحـسّ بالـمـقـهـوريـن

مـتـلـك و تـسـاعـدوا بـعـضـكـم و تـكـونـوا أخـوة , أخـوة بالـقـهـر و أخـوة

بـأيّ فـرح جـايـي , و الـفـرح مـا بـيـجـي لـوحـده يـا طـنـّـوس , لازم إنـت

تـروح لـعـنـده , مـش هـو يـجـي لـعـنـدك , و لا تـفـرح لـوحـدك , لأنـه

إذا فـرحـت لـوحـدك بـيـكـون فـرحـك أخـرس و مـا إلـو صـوت , مـا إلـو

لـحـن و لا مـوسـيـقـا , و لا بـيـطـربـك , اطـرب غـيـرك مـعـك يـا طـنـّـوس .

حـتـى مـرتـك و إنـت نـايـم مـعـهـا , إذا إنـت مـبـسـوط و هـي لأ , هـيـدا

مـا بـيـكـون بـسـط و لا فـرح يـا طـنـّوس , بـتـكـون مـتـلـك مـتـل أيّ مجرم

عـم يـغـتـصـب امـرأة غـريـبـة .

اسـمـع مـوسـيـقـى يـا طـنـّوس , اقـرا كـتـب , اقـرا شـعـر , اكـتـب شـعـر .

مـا بـتـعـرف تـكـتـب شـعـر؟ مـش كـارثـة , شـو بـدّك بالـتـصـفـيـق

و بـتـصـاريـف الأفـعـال , اكـتـب لإلـك , لـمـرتـك , اكـتـب قـصـيـدة لـمـرتـك

حـتـى لـو كـانـت قـصـيـدة بـايـخـة , مـعـلـيـش , هـيّ مـش رح تـشـوفـهـا

بـايـخـة , صـدّقـنـي يـا صـاحـبـي , طـيـب مـاشـي , بـلا مـا تـكـتـب , اقـرالـهـا

قـصـيـدة لـنـزار قـبـانـي , لـمـحـمـود درويـش , لـدو مـوسـيـه :

( هـات يـا شـاعـر قـيـثـارك و ابـدأنـي بـقـبـلـة )

و بـوسـهـا قـبـل الـقـصـيـدة و بـعـد الـقـصـيـدة يـا طـنـوس , الـبـوسـة بعـد

الـشـعـر بـتـكـون مـتـل قـصـيـدة حـلـوة كـتـيـر , قـصـيـدة بـيـرجـف قـلـبـها

لـمـّا تـسـمـعـهـا أو تـقـراهـا , أو تـحـسّ فيها , بـوسـهـا يـا طـنــّـوس .. اكـتـب

أحـلـى الـقـصـايـد عـلـى شـفـاف مـرتـك ..

عـم تـفـهـمـنـي يـا طـنـّـوس ؟



جـو غـانـم

14 \ 10 \ 2009