الخميس، 15 أكتوبر 2009

طـقـوس





كـلّ يـوم الـصـبح أوّل مـا بـوعى من النوم , بـيـطـلـع عَ بالي

ابكي , لـو شي دقيقتين , صـارت الـحـالـة مـتـل الـطـقـس .

متل إذا شي حدا لازم يصلّي حتى يـبدا نهاره و هو مرتاح .

أول مـا بـفـتـِّح عيوني , بـمـدّ إيـدي و هي نـصّ مـخـدّرة

و بـعـطـي الإذن بـبـدء الـحـفـلـة , و بـتـبـدأ فيروز تـقول

و تـسـلـطن , و لا مرّة حسّيت اني عم بسمع فيروز لوحدي و أنا

بهالحالة , مع اني لوحدي بـالبيت , صرلي شي تسعين سنة

لوحدي بهالبيت , و دايما بتخايل إنه في حدا عم يسمع معي .

و انه من واجبي سمّعه متل ما بسمع , من واجبنا نسمع سوا .

الهوا اللي بالغرفة , الصور اللي فيها ناس مشـتـقـلـُـنْ , الشباك

اللي مسكّر و بيعرف عَ شو مسكّر و ليش , بشعر انه كلّ هالإشيا

كائنات موجودة و متفاعلة معي و مع الصوت و مع الوضع كلّه .

و كـلـُّنْ رح يبكوا بعد شي خمس دقايق , لما توصّلنا فيروز سوا

لقمّة الشجن .. هون بـيصير البكاء واجب , و إلو لـذة عجيبة .

انشالله مفكَّر انه البكي زعل و حزن و بس ؟ غلطان يا طنـّوس

غلطان كتير يا صاحبي , اللي ما وصل لذروة لذة البكاء , بتكون

إشيا كتير غابت عنه بهالحياة . فـي نـوع مـن الـبـكـاء بـيـخـتـلـط فـيـه شيء

من الحزن و شيء من الفرح , و أشياء من الشجن و الشوق و السُكر

و الإيمان و الـحـبّ .

لما بوصل لهالحالة كل يوم , بقوم من تـخـتـي , و بوقف بنص الغرفة

و بفتح إيديّي عالاّخر , متل اللي بدّو يحضن حـدا , و بـبـدأ الرقص

مع هالكائنات , حـدا بـيـعـلـِّـي الصوت بهاللحظة , ما بعرف مـيـن .

يمكن أنا , و يمكن شي حـدا مـدّ إيـده مـن الـصوَر , أنا بـقـول دايماً

انه جبران أخي هو اللّي بـيعلـّي الصوت , جبران بـيشبهني كتير .

بـتـطـلــّع من الشباك و أنا عم برقص بالغرفة , بشوف الشارع بـرّا .

شكله متل شي نشاز باللحن , أو متل لون وقع بالغلط عاللوحة

و تركه الرسّام و قال حرام .. اتركوه ... بـتـطـلــّع فـيـه بـنـظـرة

شـمـاتـة غـالـبـاً , و بـقـلـّه : اسمع .. اسمع يا أخو الشر...

ما بـيـلـتـفـت , بـيـمـشـي بـطـريـقـه ..

لـويـن بـتـروح الشوارع ؟

مـا بـتـتـعـب ؟ و طول الوقت عم تسمع أصوات مزعجة و عم

يدعسوها الناس , و عم تمحيها عجلات السيارات .. أكيد الشوارع

بـتـبـكـي كمان , بس بكاء مزعج , ما فيه أي لـذة ..

منيح إني مش شارع .

لو كنت شارع .. كنت رحت و ما رجـعـت .

خـلـّي الصوت عـالـي .. رح يبدا نهاري .

هـلـّق صار فيني قول إني موجود بهاليوم , و في جوّاتي أحاسيس

عظيمة بتساعدني تا ابقى إنسان طول اليوم .

ــ عفواً , ما بدي قاطع حديثك يعني , بس مش ملاحظ انك صـاير

عم تـكـتب بالعاميّة كـتـيـر ؟

ــ مـا بـعـرف ابـكـي بالـفـصـحـى . .. بالفصحى بـدمـِّـع بس .

ــ إي بس هيك مش منيح .. و مش حلو منّك .

ــ اخـرس

ــ طـيـّـب .



ج . غانم

14 \ 10 \ 2009

* * * * * * *



ــ إنت .. بعرف وين رايح

ــ وين؟

ــ إنتَ عم تـفـتّـش عَ بـيـتـُنْ

ــ إيه إيه .. بتعرفيلي وين بـيـتـُـنْ ؟

ــ بـيـتـُـنْ بالحيّ العالي , هونيك شارع كلـّه دراج

ــ بعد ما عرفت .. دلـّيني أكتر

ــ شوف , بتروح عَ بيت الشبّ اللي بـيـحـبّ جـارتـهـُنْ و هـو بـيـدلـَّك

ــ إي إي كـفـّي

ــ بـتـريـد شي بـعـد ؟

ــ لا لا , متشكّر , مع السلامة ... و الله أهل عين الرمّان لـُـبـَـقـَا . بس يه يه

يا حلوة .. بـيت اللي بـيـحـبّ جـارتـهـُنْ ويـن ؟؟

* * *

ــ عـرفـتــيَّـا؟؟

ــ عـرفـتـا

ــ لـهـا غـرّة و عيونها عيون خيلات الورد و الزنبق , و فستانا مصوَّر عليه

جوانح عصافير و زرازير .. عـرفـتـيـَّا ؟

ــ عـرفـتـَا .. بـيـتــُنْ إلو قناطر بـيض و في عـلـيِّـة لها درابزين أخضر .

ــ شي حلو

ــ و في بالعليّة مقعد إلو مساند ملوّنة بوراق دَوالي

ــ دخلِك شو اسم هالحيّ هونيك ؟

ــ حيّ الحلوين

ــ و هـيّي .. هـيّي شو اسمَا ؟

ــ حلوة الحلوين

ــ متشكّر لطفك , الله يكون معِك .. حلوة الحلوين !! يه يه , كلّ وحـدة هون

اسمها حلوة الحلوين !!

* * * *

ــ و الطريق عَ بـيـتـُنْ مزروع بالحكايات

ــ يا عيني

ــ و بليالي القمريّات بـيضيعوا الغناني عالطريق

ــ يا عيني

ــ و بـتـطلّ عن شبّاكا و بيرتاح الضوّ بـعـيـونا الخـضـر

ــ يا عيني

ــ و كلّ القلوب بتسأل عن عينيها الخضر , و بتسأل عن شبّاك الحلوة

لا تـقـول بـيـتـَا ويـن.. بـيـتـا عَ كلّ مفرق و بكلّ شارع بـيـطلّ عليه قمر

هـونيك الدرابزين كـلـّـه زهور , و العشّاق بـيـغـنـّوا .

ــ يا عيني .



هناك 4 تعليقات:

جبهة التهييس الشعبية يقول...

لذة البكا؟ لا يا نكدي
انا البكا بيخليني اتعب كأني جريت كتير
:)
سلامة قلبك على رايكوا

حـنــّا السكران يقول...

أيوه يا نوارة يا صديقتي العزيزة , بس انت وضعك مختلف , إنت بطل العالم في البكاء و محطمة أكتر من رقم قياسي هههه , منشان هيك بتحسّي انك جريت مسافة طويلة ههههه ماراتون ... أطيب قلب نوارة في الدنيا .
الله يسلمك و يفرّحك دايما يا نوارة .

غير معرف يقول...

البكاء يصبح احيانا كثيره نعمه .... ولكن تستعصي علينا احيانا اكثر

انا ماعرفتش افهم الجزء الاخير .... اصل اللهجه اللبناني صعبه عليا احيانا

بس حسيت انها كويسه :D

تحياتي

الشقية يقول...

لذيذة هذه الأسطر . .
حلوة الحلوين . . المفرق . .
صوت فيروز . .
أشعر أنني أريد البكاء بلذة . .
ربما الليلة كـ أمس . . سـ أضع رأسي فوق وسادتي وأبدا بالبكاء بلذة

دمت أيها الكأس . .

11